కశ్మీర్‌లో టూరిస్టులపై ఆంక్షల ఎత్తివేత

08 October, 2019 - 7:50 PM

(న్యూవేవ్స్ డెస్క్)

శ్రీనగర్‌: పర్యాటకులపై విధించిన ఆంక్షలను జమ్ము కశ్మీర్ ప్రభుత్వం ఎత్తివేసింది. ఉగ్రవాద ప్రమాదం నేపథ్యంలో పర్యాటకులంతా కశ్మీర్‌ నుంచి తక్షణమే వెళ్లిపోవాలంటూ ఆగస్టు 2న జారీచేసిన హెచ్చరికను ఎత్తివేస్తున్నట్లు గవర్నర్‌ సత్యపాల్‌ మాలిక్‌ ప్రకటించారు. అక్టోబర్‌ 10 నుంచి ఈ ఆదేశాలు అమల్లోకి వస్తాయన్నారు. జమ్మూకశ్మీర్‌కు ప్రత్యేక ప్రతిపత్తిని రద్దు చేస్తూ ఆగస్టు 5న కేంద్రం నిర్ణయం తీసుకోవడానికి మూడు రోజుల ముందు ఈ ఆంక్షలు విధించారు. కాగా.. అక్టోబర్‌ 24న జరగాల్సిన బ్లాక్‌ డెవలప్‌మెంట్‌ కౌన్సిల్‌ ఎన్నికలకు సంబంధించి నిర్ణయం తీసుకునేందుకు వీలుగా జైళ్లలో ఉన్న ఆయా పార్టీల నేతలను కలుసుకునేందుకు ఇతర నేతలకు అనుమతినిస్తున్నట్లు కూడా గవర్నర్‌ ప్రకటించారు.

ప్రభుత్వ ఆంక్షల నేపథ్యంలో వరుసగా 65వ రోజు కశ్మీర్‌ లోయలో జనజీవనం స్తంభించింది. మార్కెట్లు, ఇతర దుకాణాలు తెరుచుకోలేదు. ప్రజా రవాణా వ్యవస్థకు సంబంధించిన వాహనాలు ఇంకా రోడ్డుపైకి రాలేదు. ప్రైవేటు వాహనాలు, టాక్సీలు, ఆటోలు మాత్రమే తిరుగుతున్నాయి. కశ్మీర్‌లో లాండ్‌లైన్‌ టెలిఫోన్‌ సేవల్ని పునరుద్ధరించారు. అనేక ప్రాంతాల్లో ఇంకా సెల్‌ఫోన్‌ సర్వీసులు అందుబాటులోకి రాలేదు.

కాగా.. మాజీ సీఎంలు, ఎన్‌సీ అధ్యక్ష, ఉపాధ్యక్షులు ఫరూక్‌ అబ్దుల్లా, ఒమర్‌ అబ్దుల్లా తదితర ప్రధాన పార్టీల నేతల గృహ నిర్బంధం ఇంకా కొనసాగుతోంది.