భారీ నష్టాల్లో ఎస్‌బీఐ

22 May, 2018 - 4:19 PM

(న్యూవేవ్స్ డెస్క్)

ముంబై: ప్రభుత్వ రంగ దిగ్గజ బ్యాంకు స్టేట్‌ బ్యాంకు ఆఫ్‌ ఇండియా (ఎస్‌‌బీఐ) భారీగా నష్టాల్లో కూరుకుపోయింది. మార్చి క్వార్టర్‌‌లో బ్యాంకు నష్టాలు రూ.7,718 కోట్లకు పెరిగాయి. గత ఏడాది కంటే మొండి బకాయిలు ఈ త్రైమాసికంలో రెండింతలు పెరగడంతో బ్యాంకు తీవ్ర నష్టాలు నమోదు చేసింది. మొండి బకాయిలు గత ఏడాది ఇదే త్రైమాసికంలో రూ.11,740 కోట్లు ఉంటే, ఈ ఏడాది రూ.28,096 కోట్లకు పెరిగాయి. ఎన్‌‌పీఏ ప్రొవిజన్లు కూడా క్యూ4లో పెరిగినట్టు తెలిసింది. స్ట్రీట్‌ అంచనాలను మించి బ్యాంకు నష్టాలను మూటగట్టుకుంది.

ఎస్‌బీఐ బ్యాంకు కేవలం రూ.1,795 కోట్ల నష్టాలను మాత్రమే రిపోర్టు చేస్తుందని విశ్లేషకులు అంచనా వేశారు. కానీ వారి అంచనాలకు మించి భారీ మొత్తంలో ఎస్‌‌బీఐ నష్టాలు పొందినట్టు క్యూ 4 ఫలితాలను చూస్తే.. తెలుస్తోంది.

డిసెంబర్‌ క్వార్టర్‌‌లో కూడా బ్యాంకు రూ.2,413.37 కోట్ల నష్టాలు చవి చూసింది. మొత్తం అడ్వాన్స్‌‌ల్లో స్థూల నిరర్థక ఆస్తులు (ఎన్‌‌పీఏ) 10.91 శాతానికి పెరిగాయి. ఇవి డిసెంబర్‌ త్రైమాసికంలో 10.35 శాతంగానే ఉండేవి. బ్యాంకు మొత్తం ఆదాయం ఈ జనవరి నుంచి మార్చి కాలంలో రూ.68,436.06 ​కోట్లుగా నమోదైనట్టు తన రెగ్యులేటరీ ఫైలింగ్‌‌లో పేర్కొంది. గతేడాది ఇదే కాలంలో బ్యాంకు ఆదాయం రూ.57,720.07 ​కోట్లు ఉన్నాయి.

ఈ మార్చి త్రైమాసికంలో పంజాబ్‌ నేషనల్‌ బ్యాంకు అనంతరం అత్యధిక నష్టాలను నమోదు చేసిన రెండో బ్యాంకు స్టేట్‌ బ్యాంకు ఆఫ్‌ ఇండియానే. నీరవ్‌ మోదీ కుంభకోణ నేపథ్యంలో పీఎన్‌‌బీ బ్యాంకు రూ.13,417 కోట్ల నష్టాలను నమోదు చేసింది. ఫలితాల ప్రకటన నేపథ్యంలో బ్యాంకు 5.2 శాతం పైకి ఎగిసింది.