‘చార్ సౌ సాల్ జియో’ పథకం ప్రారంభం

26 September, 2017 - 8:06 PM

(న్యూవేవ్స్ ఫేకింగ్ న్యూస్ ప్రతినిధి)

న్యూఢిల్లీ :  దేశంలోనివారంతా కనీసం నాలుగు వందల సంవత్సరాలు జీవించేందుకు వీలుగా కేంద్ర ప్రభుత్వం యోగా గురు బాబా రామ్‌దేవ్ ప్రతిపాదించిన జీవన పద్ధతులు అమలు చేయడం ప్రారం భించింది. ఇక మీదట పౌరులంతా  బాబా చెప్పినట్లే చేయాలంటూ కేంద్రం ఆదేశాలు జారీ చేసింది. మనిషి శరీరం నాలుగు వందలేళ్లు జీవించేందుకు రూపొందించబడిందని బాబా రామ్‌దేవ్ ఇటీవల వ్యాఖ్యానించిన సంగతి తెలిసిందే. దరిమిలా మోదీ ప్రభుత్వం బాబాతో సుదీర్ఘంగా సంప్రదింపులు జరిపి ఆ మేరకు కొన్ని కీలక నిర్ణయాలు తీసుకుంది. ఇందుకు అనుగుణంగా ‘చార్ సౌ సాల్ జియో యోజన’ పథకాన్ని (దీనికి రిలయెన్స్ జియోతో సంబంధం లేదు) మోదీ ప్రభుత్వం ప్రారంభించింది. దీని ప్రకారం ఇకపై స్కూళ్లలో బాబా విధానాలను కచ్చితంగా పాటించాలని కేంద్రం నిర్దేశించింది. బాబా పద్ధతులు పాటించే వారంతా నాలుగేసి వందలేళ్లు బ్రతుకుతారు కాబట్టి అందుకు అనుగుణంగా రాజ్యాంగంలో మార్పులు చేసేందుకు ఒక రాజ్యాంగ పునర్లేఖన కమిటీని ఎన్డీఏ ప్రభుత్వం నియమించింది. ఈ అత్యున్నత కమిటీ మంగళవారం సమావేశమై కొన్ని నిర్దిష్టమైన సిఫారసులు కూడా చేసింది.

వాటి ప్రకారం- ఇక మీదట ఎవరికైనా వందేళ్ల వయసుంటేనే మైనారిటీ తీరినట్లుగా భావిస్తారు. వందేళ్ల తర్వాతే ఎవరికైనా ఓటు హక్కు ఇస్తారు. వందేళ్లుంటేనే వివాహ వయసుగా పరిగణిస్తారు. అప్పటి వరకు చిన్న పిల్లల కిందే లెక్క కాబట్టి వారికి సరిపడా స్కూళ్లని ఏర్పాటు చేయాలి. వందేళ్ల పాటు చదివేలా విద్యార్థులకు జంబో సిలబస్ ఏర్పాటు చేయాలి. మనిషి నాలుగు వందలేళ్లు బ్రతికితే దేశంలో సంతానం కూడా విపరీతంగా పెరిగిపోయి సంక్షోభం ఏర్పడుతుంది కాబట్టి మార్స్ వంటి గ్రహాలలో మానవ మనుగడకు సంబంధించిన పరిశోధనలు వెంటనే చేపట్టాలని ఈ కమిటీ సూచించింది. భూమ్మీద మిగతా దేశాల పౌరులకూ భారతీ యులకూ మధ్య వయసులో భారీ తేడా ఉంటుంది కనుక ఆ మేరకు తగిన చర్యలు చేపట్టాలి. ప్రభుత్వ ఉద్యోగులు ఇకమీదట రెండువందల యాబై ఏళ్లకి రిటైర్ అవుతారు. మూడు వందల ఏళ్లు దాటినవారిని ఇకపై వయోధికులుగా భావిస్తారు. వారికి సీనియర్ సిటిజన్లుగా కొన్ని రాయితీలు కల్పిస్తారు.

అంతా నాలుగు వందలేళ్లు బ్రతికితే ఏర్పడే ట్రాఫిక్ సమస్య పరిష్కారం కోసం నాలుగేసి అంతస్తుల రోడ్లు నిర్మించవలసి వుంటుంది. వారు నివసించేందుకు నాలుగేసి వందల అంతస్తుల అపార్ట్‌మెంట్లు కూడా ఏర్పాటు చేయాలి. అలాగే ఇప్పుడున్నదానికి వందల రెట్లు ఎక్కువగా ఆహారధాన్యాల ఉత్పత్తి చేయవలసి ఉంటుంది. అలాకాక యోగాభ్యాసం ద్వారా మనుషులు కేవలం గాలి పీల్చుకుని బ్రతక గలిగే అవకాశం ఎంత వరకు ఉంటుందో కూడా బాబా రామ్‌దేవ్ పరిశీలించాలి.

ఈ సిఫారసుల పట్ల- ఇటీవల 38 కిలోల బరువు తగ్గిన- బీజేపీ అధ్యక్షుడు అమిత్ షా హర్షం వ్యక్తం చేశారు. అయితే భారతీయ సంస్కృతి సంప్రదాయాలను గౌరవించేవారికి మాత్రమే నాలుగువందల ఏళ్ల పాటు బ్రతికే అవకాశం ఇవ్వాలని ఆయన డిమాండ్ చేశారు. వామపక్ష, విపక్ష మద్దతుదారులను అందుకు అనర్హులుగా ప్రకటించాలన్నారు. అయితే దీనిని రాహుల్ గాంధీ ఒక ట్వీట్‌లో ఖండించారు. బీజేపీ, దాని మిత్రపక్షాలవారు మాత్రమే నాలుగు వందలేళ్లు బ్రతికి అధికారంలో కొనసాగాలనే కుట్ర జరుగుతోందని ఆయన ఆరోపించారు. దీని వెనుక సంఘపరివార్ శక్తులు ఉన్నాయని ఆయన విమర్శించారు.

ఇదిలావుండగా రామ్‌దేవ్‌ను ప్రభుత్వం రాజగురువుగా ప్రకటించింది. ఆయనకు ఏ టు జెడ్ ప్లస్ భద్రతను కల్పించింది. ఇకపై పౌరులంతా రామ్‌దేవ్ పతంజలి ఉత్పత్తులను మాత్రమే కొనుగోలు చేసి వాడాలని కూడా రాత్రి బాగా పొద్దుపోయాక ఆదేశాలు జారీ అయ్యాయి. మరోవైపు, మనిషి నాలుగు వందల ఏళ్లే కాక రెట్టింపు కాలం- ఎనిమిది వందల ఏళ్లు బ్రతికేందుకు కూడా పరిశోధనలు చేస్తానని రామ్‌దేవ్ ప్రకటించారు. ఆ తర్వాత మనిషి ఎప్పటికీ చనిపోకుండా బ్రతికి వుండే మార్గాలను సైతం శీర్షాసనం వేసి కనిపెడ తానన్నారు. కాగా, భారతదేశంలో చోటు చేసుకుంటున్న ఈ ఆసక్తికర పరిణామాలను అమెరికా, చైనా, రష్యావంటి దేశాలు నిశితంగా పరిశీలిస్తున్నాయి. నాలుగు వందల ఏళ్లు జీవించే రహస్యం ఉత్తర కొరియా దేశాధ్యక్షుడు కిమ్ జంగ్ ఉన్ చేతుల్లో కనుక పడితే ప్రపంచానికి పెను ప్రమాదమేనని అమెరికా ప్రెసిడెంట్ ట్రంప్ ఆందోళన చెందుతున్నట్లు వార్తలు వెలువడుతున్నాయి.